LAOAG CITY – Pimmusay ti maysa a lalaki kalpasan a nalmes daytoy iti Madongan Dam Brgy. Cacafean, Marcos Ilocos Norte.
Basar iti inisyal nga imbestigasyon ti Philippine National Police iti ili ti Marcos, ti biktima ket agtawen ti 25, awanan ti asawa, janitor ken residente ti Brgy. Caribquib iti ili ti Banna.
Segun kadagiti otoridad, kabayatan nga agdidigos da daytoy ken ti kaduana nga agtawen ti 44 iti nasao a karayan nga agpada nga adda ti impluwensya ti nasanger ket dita a naripar dagiti dadduma pay a kakaduada a mapukpukaw ti biktima.
Gapu iti daytoy, dagusda a napan dimmawat ti tulong ken in-report ti pasamak iti PNP personnel, BFP & Medical Team nga insigida met dagitoy a nagresponde iti lugar.
Mainaig iti daytoy, dagus met a nangisayangkat ti search and rescue dagiti otoridad ket saan a nagbayag ket dita a nakitada ti bagi ti biktima nga insigida daytoy a naitaray iti Dona Josefa Edralin Marcos District Hospital ngem naideklara a dead on arrival babaen iti attending physician a ni Dr. Ruth Anne Corpuz.
Kabayatanna, agtultuloy met pay laeng ti imbestigasyon dagiti otoridad pakaseknan iti nasao a pasamak.
