LAOAG CITY – Inistorya ni Police Major Jephre Taccad, hepe ti PNP-Pinili ti napasamak a panangbastos ti maysa a lalaki iti maysa a kagawad bayat a nakaduty iti Border Control Checkpoint iti Barangay Puritac iti nasao nga ili.
Binigbig na ti kagawad a ni Zenithe Gil Gajultos ken ti suspek ket ni Aris Dacanay y Bumanglag, 41, naasawaan, manallon ken residente iti Brgy Pugaoan, Pinili, Ilocos Norte.
Segun kenni Taccad, bayat a mangmangan dagiti opisyales iti nasao a barangay idi lumabas ni Dacanay kadwa na ti menor de edad nga anak na a nakalugan ti starex ngem nagsardeng ken maiparop a nag-dirty finger ken pinagsawan na ti “bastos ka” ni Gajultos.
Gapo iti daytoy, kinamat dagiti opisyales ti suspek ken idi natiliw da ket inpakaammo na da a dagus iti pulisya.
Inbatad ni Taccad nga idi adda iti police station ni Dacanay ket nagsao-sao, ken idi adda da iti kalsada paset ti Barangay Darat iti nasao nga ili tapno ipa-medical daytoy iti ili ti Sinait, Ilocos Sur ket ginandat na ti rumwar ken nagrugit iti uneg ti patrol rason a napilitan dagiti pulis a rumwar ken dalusan ti suspek.
Nupay kasta, kuna ni Taccad nga idi nadalusan dan ni Dacanay ket nagrugit manen ken ti nangdalos kenkuana ket ti pulis nga ummunan a kinagat na ken hinedbat na daytoy.
Inlawlawag na a kalpasan daytoy ket nagpukka-pukkaw ni Dacanay ken nagtaray ken kellaat a simrek iti balay ti pamilya Pagdilao a silalamo-lamo ken nagdiretso iti maikadwa a kadsaaraan nga isu ti naglemmengan na.
Naamoan a nakatinnulong ti agtagikua ti balay isut gapo na a natiliw met laeng ti suspek.
Mainaig iti daytoy, kuna ni Taccad a saan nga admitiren ti suspek ti inaramid na ken agpapan maisursurat ti damag ket saan da pay a nakasarita daytoy gapo iti napalaos a kinabartek na.
Innayon ni Taccad a mangala da ti statement ti agtagikua ti balay a simrekan ti suspek.
Kabayatanna, manamnama a mapilaan ti suspek iti panaglabsing iti R.A. 11469, Article 151 iti Revised Penal Code, dua a count ti Direct Assault and Unjust Vexation, ken saan a panagisuot ti face mask.
