LAOAG CITY – Naglikudan ni Barangay Kagawad Mark Anthony “Bibing” Calsada iti Barangay 5 iti ili ti Vintar ti alegasyon a saan a naipakammo iti Barangay Council ti panagala da ti benipisyaryo ti TUPAD.
Segun kenni Calsada, mismo pay nga adda ti nagan ti anak ni Barangay Chairman Noli Tunac ken isuna ti mapabpabasol a nangikkat iti nasao a nagan.
Inlawlawag na a ti DOLE ken ti opisina ni Congresswoman Ria Fariñas ti nangipan ti red mark iti nagan dagiti kabbalay ti kapitan.
Inpetteng na nga ammo ti kapitan ti panagala kadagiti benipisyaryo ti TUPAD nangruna ket adda pay ti nagan ti anak na isut gapo na nga imposible a saan nga ammo daytoy ti kapitan.
Dinakamat na nga uray dagiti kameng ti barangay council ket ammo da daytoy ken nagpili met dagiti maseknan ti saglilima a tao.
Mainaig iti daytoy, kunana a 20 laeng ti slot idi a naipakammo kadakuada ngem nanayunan agingga a nagbalin a 50 nga indibidual.
Kunana nga isuna ken ni Barangay Kagawad Lorenzo Agbayani ti mismo a kinasarita ti mismo Municipal Coordinator ni Cong. Fariñas seknan iti daytoy.
Kalpasan daytoy, idi mapan na ibaga iti kapitan daytoy a banag ket awan ti opisyal iti pagtaengan da isut gapo na nga inbaga na lattan iti anak daytoy.
Ummuna iti daytoy, inbatad ni Barangay Chairman Noli Tunac nga arig na tungpa kenkuana ti saan a panangipakammo kenkuana ti kagawad iti panagpili na kadgaiti benipisyaryo ti TUPAD program ken dagiti napili ket maipagarop a saan a kwalipikado.
Malaksid iti daytoy, kwinestyunaran na pay ti maipagarop a blangko a DTR ngem adda ti pirma ti benipisyaryo, ken nagtrabaho laeng dagitoy idi kinastigar na.
