LAOAG CITY – Pinaruk-atan dagiti otoridad idiay India kalpasan ti walo a bulan a pannakaipupok ti maysa a kalapati nga inpagarupda nga spy ti Chinese government.
Idi Mayo 2023, adda ti natiliw a kalapati dagiti otoridad iti maysa a port iti Mumbai. Inlemmengda pay laeng ti tumatayab gapu iti maatap a ti nakatali iti dua a luppo daytoy nga addaan ti Chinese characters.
Gapu iti daytoy, nagatap dagiti detective a mabalin nga involved iti espionage ti tumatayab isu a nagdesisionda nga ipupok pay laeng daytoy iti Bai Sakarbai Dinshaw Petit Hospital for Animals.
Kalpasan ti walo a bulan, naduktalanda a ti kalapati ket maysa nga open-water racing bird manipud idiay Taiwan. Nakaruk-at daytoy manipud iti kulunganna ken nakadanon idiay India.
Kalpasan a nakumpirmaran a saan nga espiya ti kalapati, inkabilda daytoy iti Bombay Society for the Prevention of Cruelty to Animals.
Kabayatanna, kinita dagiti beterinario a nasayaat ti kasasaad ti kalapati, pinaruk-atanda daytoy tapno makatayab ken makasubli iti pudnona a pagtaengan.
