LAOAG CITY – Inpasingked ni Harold Dave Constantino, ti subject ti search warrant operation iti Sitio Maharlika, Barangay 1 ditoy siudad ti Laoag nga awan ti ammo na kadagiti naala nga ebidensya kontra kenkuana.
Immuna iti daytoy, naiserbi ti search warrant nga inparuk-at ni Judge Myra Shiela Nalupta iti Regional Trial Court Branch 65 ditoy siudad ti Laoag kontra ken ni Constantino gapu iti panagsalungasing iti Republic Act (RA) 10591 wenno Comprehensive Firearms and Ammunition Regulation Act.
Nailanad iti search warrant a sukimaten dagiti otoridad iti balay ni Constantino ti Kalibre 38 ken bala ti nasao a paltog.
Iti panagsukimat dagiti otoridad ket naala da ti maysa kalibre 38 nga addaan ti innem a bala malaksid pay ti immuna a nakita da a dua a bala.
Naamoan a ti subject ti operasyon ket addan ti immuna a kaso na a qualified theft ken panagtakaw ti motorsiklo.
Inpetteng ni Constantino a saanna a kukua ti paltog ken dagiti bala a naala iti balayda, ngem nadakamat na a tunggal mabartek ti ama na ket ibagbaga na a papatayen na dagitoy banag a pagbutbutngan ti ina na.
Kuna met ti ina ti subject ti operasyon a ni Mrs. Luzviminda Constantino nga awan ti mabalin da no adda ti naala nga ebidensya dagiti otoridad iti balay da.
Mainaig iti daytoy, inbatad ni Barangay Kagawad Manny Morales iti Barangay 1 ditoy siudad ti Laoag a nakigtot da iti naisayangkat nga operasyon kontra ken ni Harold Dave Constantino kangrunaan na ket nagpositibo daytoy.
Inbutaktak na a ti subject ti operasyon ket maibilang a sakit ti ulo ti barangay da gapu kadagiti kaso na a panagtakaw no sadinno a maysa pay kadagiti tinakawan na ket ni Konsehal Derek Lao ditoy siudad a nakabaludan ti suspek.
