LAOAG CITY – Pimmusay ti maysa a kameng ti AFP kalpasan ti napasamak a desgrasya iti paset ti Brgy. Lioes iti ili ti Currimao.
Binigbig ni PLt. Medel Perinion ti hepe ti PNP Currimao ti biktima a ni CPL Angelito Mama y Paloma, agtawen ti 53, naasawaan, AFP Personnel ken residente iti Brgy. Aclan Nasipit, Agusan del Sur.
Segun ken Perinion, agpapaabagatan a direksyon ti maysa nga Isuzu DMAX nga inturong ni Danilo Basabas y Cudiamat, agtawen ti 60, naasawan ken residente iti Brgy. Sto Tomas, Candon, Ilocos Sur idi ta kellaat a simmabat ti Yamaha Sniper nga inturong ni Mama.
Gapu iti daytoy, nagdinungpar dagiti dua a lugan rason a naipurwak ni Mama agarup 10 a metro ti kaadayo na manipod iti Isuzu Dmax.
Kuna ni Perinion a naitaray iti Currimao RHU ni Mama ngem naideklara a dead on arrival.
Mainaig iti daytoy, inpakaammo na a saan met a nagsagaba ti aniaman a sugat ti driver ti Isuzu Dmax ken dagiti dua nga inlugan na.
Inbaga ti hepe a posible a saan a nakontrol ti kameng ti AFP ti preno na apaman sumrek iti national highway isut gapu na a saan na a naripar ti sumungad nga Isuzu Dmax.
