LAOAG CITY – Natay ti maysa a kameng ti LGBT wenno lesbian, gay, bisexual, transgender kalpasan a nagbekkel iti ili ti San Nicolas.
Ti biktima ket agtawen iti 44, awanan asawa, hairstylist, ken residente iti nadakamat nga ili.
Inlawlawag ni Deputy Chief of Police Ashley Cacayorin, iti ili ti San Nicolas, nga apaman a napan ti kaanakan ti biktima iti balay ti biktima ket dita a nakigtot isuna iti naimatangan na.
Dagos met a nagpukkaw ti tulong ti kaanakan na ken naitaray ti biktima iti Black Nazarene Hospital ngem naideklara a dead on arrival babaen ti doktor a nangtaming kenkuana.
Basar iti imbestigasyon, ti biktima ket nangaramat iti waya ti kuryente nga inpulipolna iti teng-ngedna.
Ummuna iti daytoy ket naamuan nga adda ti panangibagbaga ti biktima nga agpakamatay isuna kadagiti nasisinged kenkuana ngem saanda nga inkaskasao gapu ta saanda a mamati a kaya na nag aramiden daytoy.
Kabayatanna, imbatad ni Cacayorin ti rason ti panagpakamatayna ket ti maipagarop a panagsinada iti nobyo na.
