LAOAG CITY – Natiliw ti maysa a kameng ti LGBT babaen ti drug buy bust operation nga inyuswat dagiti kameng ti PNP Laoag iti Brgy. 54-B Camangaan ditoy siudad.
Nabigbig ti suspek a ni Mario Agcaoili, agtawen ti 36, hairstylist, ken residente iti Pallas, Sitio Cabulalaan iti ili ti Vintar.
Nagatang ti nangpammarang a gumatang ti iligal a druga ti maysa a sachet a naglaon ti saan pay a natumek a maipagarup a shabu.
Segun kenni Police Lt. Col. Rafael Lero, hepe ti PNP Laoag, agdagsen iti 1.1 grams ti maipagarup nga iligal a druga ken agbalur iti 11 a ribo a pisos.
Kuna na a dati a natiliw ti suspek gapu met laeng iti iligal a druga idi Hulyo 2018.
Naglikudan ti suspek a kukua na ti narekobre dagiti otoridad.
Maisagsaganan ti maipila a reklamo kontra kenni Agcaoili gapu ti panaglabsing iti RA 9165 wenno Comprehensive Dangerous Drugs Act of 2002.
