LAOAG CITY – Nagballigi dagiti otoridad a nangarestar iti maysa a kameng ti LGBTQ wenno Lesbian, Gay, Bisexual, Transgender, and Queer iti naisayangkat nga anti-illegal drug buy-bust operation iti Barangay Davila iti ili ti Pasuquin.
Binigbig ni Police Major Sheryl Guzman, ti chief of police iti ili ti Pasuquin ti suspek a ni alyas “Mother”, agtawen ti 53, awanan ti asawa, beautician ken residente metlaeng iti nadakamat nga ili.
Inbatad ni Guzman a kinemmeg a dagus dagiti otoridad ti suspek kalpasan a naglako ti maipagarop a shabu iti nagpammarang a poseur-buyer.
Innayon na nga iti panangkapkap dagiti otoridad iti suspek ket nakakumpiskar da pay ti tallo nga heat sealed transparent plastic sachet a naglaon metlaeng ti maipagarop a shabu.
Inpakaammo ni Guzman a ti nasao a suspek ket nabayagen a monmonitoren da gapu ta maysa daytoy kadagiti inbutaktak dagiti immunan a natiliw gapu iti illegal a droga iti ili ti Pasuquin.
Iti agdama, nagtalinaed ti suspek iti Philippine National Police iti ili ti pasuquin ken sumango iti kaso a panaglabsing ti Republic Act 9165 wenno Comprehensive Dangerous Drugs Act of 2002.
