LAOAG CITY – Dimmalan iti operasyon ti maysa a kameng ti PNP ken addan ti puot na kalpasan a nadungpar isuna ti nakamotorsiklo iti ili ti Bacarra.
Daytoy ti inbatad ni Police Captain Dionisio Baldillo, ti chief of police ti PNP-Bacarra.
Binigbig met ni Baldillo ti pulis a ni Patrolman Mar Julien Rigonan Mamala a naka-assign iti PNP-Piddig ken residente ditoy ciudad ti Laoag.
Segun kenni Baldillo, nakabisikela ni Mamala nga agpaamyanan a direksyon idi nadungpar ti nakamotorsiklo nga agturong met laeng iti nasao a direksyon.
Gapo iti daytoy, kuna ni Baldillo a natulid ti pulis ken naitupar ti ulo na iti semento ken dagus a naitaray iti ospital ken dimmalan iti operasyon.
Mainaig iti daytoy, kuna ti hepe a nagsagaba met ti gasgas ti saanen a nainaganan a driver ti motorsiklo, ken rumrumwar a nakainom ti nasanger.
Innayon na nga iti agdama ket awan pay ti saritaan ti agsinnumbangir a partido mainaig iti daytoy ken maisagsaganan ti reklamo a maipila kontra iti driver ti motorsiklo.
Kabayatanna, nagpanawagan ti hepe iti publiko nga agannad nangruna ket panagtutudo ken nagalis ti dalan kasta met a liklikan ti uminom ti nasanger no agmaneho.
