LAOAG CITY – Inakusaran ni Barangay Chairman Elviro Agoo iti Barangay Davila iti ili ti Pasuquin ti maysa a kameng ti PNP-Pasuquin a nagdangran ken nagpaputok ti paltog kabayatan ti operasyon dagitoy iti panagsusugal.
Segun kenni Agoo, idi napan iti nagminatay a maysa kadagiti kagawad na ket awan pay ti nakita na a nagsusugal rason a nagawid ken iti tengnga ti parbangon ken adda ti timmawag kenkuana a kameng ti PNP a mangibagbaga a mapan agwitness iti nasao nga operasyon.
Inbatad na nga idi ur-urayen na ti maysa kadagiti kagawad na kadwa na nga agwitness ket adda ti maysa a kameng ti pulisya a napan iti balay da ken maipagarop nga inbatad ti pulis a kumkumleb ti kapitan no sadinno ket naka-megaphone pay ken saan a nakauniporme.
Kunana a gapo iti pungtot na ket simmungbat ken naglugan iti ptrol ti pulisya kalpasan ket napan da iti nakatiliwan dagiti nagsusugal.
Inbaga na a ti ammo na ket ni Police Chief Master Sergeant Joey Aninag, Chief Investigator iti nasao nga ili ti napan idi balay da ngem idi nakadanon da iti lugar a nakatiliwan dagiti nagsusugal ket maipagarop a kinumpirmaran a mismo ti pulis a ni Patromal Robin Andres ti nangakusar kenkuana a kumkumleb ken nabartek pay daytoy.
Inlawlawag na a ditoy met a nagistorya dagiti kabarangayan na seknan iti maipagarop a panagpaputok ti paltog ni Andres, tinutukan na ti paltog dagiti nagsusugal, ginandat na a posasan ti maysa a BHW, dinanog na dagiti natiliw ken pinagkaradap na dagitoy.
Rumrumwar pay nga insawang ni Andres iti dayta a gundaway a kayang-kaya na ti Barangay Davila nga isu met ti nagsakitan ti rikna ti kapitan gapo ta arig na tagtagibassiten na ti lugar da.
Naamoan a dua a pulis pakairamanan ni Andres ti ummuna a napan iti pagsusugalan ken napan laeng dagiti dadduma a pulis idi nalpasen ti raid.
Mainaig iti daytoy, kuna ti kapitan a desidido da a mangipila ti reklamo kontra iti nadakamat a pulis.
Kinumpirmaran pay ni Agoo nga adda ti nabirukan da a maysa nga empty shell a patyen da a naggapo iti paltog ni Andres.
Kabayatanna, kuna ni Mr. George Velasco, maysa kadagiti witness ken residente iti nasao a barangay a nakita na a mismo ti maipagarop a panagpaputok ti paltog ni Andres iti namin-dua a daras.
Kuna pay ni Velasco a tinutukan pay ti pulis ti paltog dagiti agama ken inpetteng na a nabartek daytoy.
Inpetteng met ni Police Lt. Roi Manuel Ordonio, chief of police ti PNP-Pasuquin a lehitimo ti inyuswat da nga anti-illegal gambling operation iti Barangay Davila iti nasao nga ili.
Segun kenni Ordonio, idi adda da iti lugar ket ado dagiti tattao ken saan da a magammatan amin gapo ta bassit da laeng a kameng ti pulisya.
Inlawlawag na nga idi ibaga da a raid ti aramiden da ket nagtataray dagiti tattao isut gapo a ginnamatan da dagiti nakatugaw.
Kwinestyunaran na ti rakurak ni Brgy. Chairman Elviro Agoo a nakainom ni Patrolman Robin Andres gapo ta awan ti nasao a kapitan iti mismo a lugar.
Inbatad na a no operasyon ket adda ti ideploy da a kameng ti pulisya a nakasibilyan iti lugar gapo ta saan da a makaoperar no uniformed personnel amin ti mapan nga ummuna, ken sumaruno dagiti naka-uniporme.
Kunana a dagiti amin a lima a natiliw ket aminado a nagsusugal ken mabalin a gapo iti pannakagammat dagiti maseknan ket inpagarop da a naharass dagitoy.
Mainaig iti daytoy, kuna ni Ordonio a basar kenni Andres ket mabalin a namis-understand laeng ti kapitan ti ak-akusaran na a pulis.
Inbunannag ni Ordonio nga isuna ti nangidaulo iti operasyon ket adda isuna iti asideg ti nakaiyuswatan ti raid.
Naglikudan pay ti hepe a nagpaputok ti paltog ni Andres ken nakasagana da a dumatag no adda ti maipila a reklamo.
