LAOAG CITY – Kinumpirmaran ni Police Captain Chris Anthony Sorsano, chief of police ti PNP-Solsona nga adda ti nangdangran a pulis iti maysa a menor de edad.
Immuna iti daytoy, napagatapan a nangitaray ti motorsiklo ti agtawen ti 15 nga ubing ngem idi napan na kuma isubli ket addan ni Police Corporal Vincent Edra ken ti agtagikua ti motorsiklo, ken ditoy a maipagarop nga insipat ti pulis ti kallugong na iti menor de edad.
Segun kenni Sorsano, idi napan ni Mrs. Mercy Espirito ken ti ubing iti kwerpo ti pulisya iti nasao nga ili ket pinagsarita na dagiti dua a kampo, a pakairaman ti imbestigador.
Inpetteng na a saan a nakibiang iti saritaan ken ti laeng ammo na ket dimmawat ti pammakawan ti pulis ken mabalin a napakawan daytoy ti kamp ti menor de edad.
Inlawlawag ni Sorsano nga idi naamoan na daytoy a napasamak ket pinaayaban na amin dagiti kameng ti PNP-Solsona ken ditoy nga inungtan na ida ken binagbagaan na dagiti maseknan.
Kunana a no maulit ket isuna ti mangaramid ti addang tapno makaswan daytoy ken inpanamnama na a saanen a mapasamak ti panagdangran babaen kadagiti pulis.
