LAOAG CITY – Naalarma dagiti residente iti Barangay Cabaroan, Piddig, Ilocos Norte kalpasan nga adda ti maipagarop a nagpap-paputok ti paltog iti maysa a pagtaengan iti nasao a barangay.
Inbatad ni Police Capt. Grandeur Tangonan, ti chief of police iti ili ti Piddig a ti maitudtudo a nagpap-paputok ti paltog ket ni Jorge Matute, supporter ti agkandidato a para mayor iti nasao nga ili.
Nupay kasta, kuna ni Tangonan nga iti papanda panagimbestigar iti lugar ket pulos ti nakita da a pagilasinan nga adda ti nagpap-paputok ti paltog iti nasao a lugar.
Kinarit pay ni Tangonan dagiti nagreport iti PNP a dumatag da a mismo iti kwerpo ti pulisya ken paneknekan da ti maipagarop a panagpap-paputok ti paltog ni Matute.
Mamati ni Tangonan nga adda ti maris pulitika na ti akusasyon ken ni Matute gapu ta daytoy ket supporter ti agkandidato a para mayor iti ili ti Piddig.
