LAOAG CITY – Naarestar ti maysa a kandidato iti kina-Konsehal ken 13 nga indibidual gapu iti maipagarup a vote buying iti Barangay 9 San Pedro iti ili ti Paoay.
Ti nasao a kandidato ket agtawen ti 65, agdama a City Councilor ken residente ti Barangay 1 Ricarte iti siudad ti Batac.
Basar iti imbestigasion, adda ti maysa a kameng ti pulisia ti nakipila iti maysa a pagtaengan iti nasao a barangay ken nakaawat ti sobre ti pulis a naglaon ti maysa a ribu a pisos ken sample ballot babaen ti maseknan a kandidato.
Mainaig iti daytoy, nagsenyal a positibo ti Intel, insigida a nagturong iti uneg dagiti otoridad nga indauloan ni P/Capt. Jackson Sugayen, Hepe ti Paoay Municipal Police Station ken nakitada nga agibunbunong ti nasao a kandidato ti kuarta kadagiti 13 nga indibidual.
Gapu iti daytoy, nagpukkaw ni P/Capt. Sugayen kadagiti kakaduana a pulis kagiddan ti panangibagana a naarestar dagiti nadakamat nga indibidual gapu iti vote buying and selling.
Naimbitaran dagiti barangay officials Officials ken Commission on Elections iti ili ti Paoay tapno imatangan ti imbestigasion.
Kabayatanna, sumango dagiti maseknan iti kaso gapu iti panaglabsingda iti Alleged Vote Buying and Selling wenno ti Comelec Resolution No. 11104.
