LAOAG CITY – Naminpinsan a dimmapo ti maysa a karinderia iti Brgy. Nagbacalan iti ili ti Paoay.
Basar iti inisyal nga imbestigasyon ti PNP-Paoay, nangrugi ti uram iti agarup alas-9:30 idi rabii.
Dagus a nagramrama ti apoy agsipod ta naaramid ti karinderia babaen kadagiti materyales nga alisto a mauram wenno ti labig.
Mainaig iti daytoy, naamoan manipod iti care taker nga adda ti kellaat a pimmutok iti uneg ti karinderia rason a namunganay ti uram.
Kabayatanna, agpapan a maisursurat ti damag ket saan pay a masinunuo ti pakadagupan a danyos ti nadadael iti nasao nga uram.
Awan met ti nairekord a nadangran iti nasao nga uram ken agtultuloy ti imbestigasyon dagiti otoridad iti pudno a namunganayan daytoy.
