LAOAG CITY – Maysa a kompania idiay China ti maak-akusaran nga unfair labor practices kalpasan nga iyakar iti nasulinek a bantay iti opisinada tapno mapilitan nga ag-resign dagiti empleyado.
Nakigtot dagiti empleado ti saanen a nainaganan pay nga advertising agency iti Xi’an City, Shanxi Province kalpasan nga inrakurakna nga iyakar iti bantay ti opisinada.
Ti baro a lokasyon ti opisina ket iti Qinling Mountains, tallo nga oras ti kaadayona manipod iti Xi’an City. Malaksid iti kinaadayona, limitado ti public transportation a mabalin a pagluganan nga agturong iti nasao a lugar. No awan ti bukud a lugan, kasapulan nga aglugan ti bus a tallo laeng a daras nga agbibiahe iti maysa nga aldaw. Iti panagbaba ti bus, masapol pay a magna ti tallo a kilometro nga agturong iti opisina.
Iti sumagmamano nga aldaw a panagopisina dagiti empleado, naammoanda a kurang ti basic amenities ti opisina ken kasapulan pay a mapan iti sumaruno nga ili tapno makausar ti naurnos a kasilyas dagiti babbai. Adu pay dagiti walang nga aso iti lugar ken delikado a magna iti rabii.
Saan a nagbayag ti kaadduan kadakuada ket nag-resign dagiti 14 kadagiti 20 nga empleado daytoy. Uppat nga aldaw kalpasan a nag-resign dagiti 14 nga empleado, dagus nga insubli ti advertising agency ti opisinada iti Xi’an City ken agbirbirokda ti agbalin a baro nga empleado.
Basar ti maysa kadagiti dati nga empleado a nag-resign, nairanta a maiyakar iti nasulinek a lugar ti opisina tapno ag-resign ken makatipid iti panangipaay ti severance pay.
Napagsasaritaan daytoy kadagiti Chinese netizens ken magutgutigot dagiti maseknan a dati nga empleado a mangipila ti kaso. Iti agdama, maiyur-uray no ipursigeda ti panangipila ti kaso.
