LAOAG CITY – Kinumpirmaran ni Police Senior Inspector Chris Anthony Sorsano, hepe ti PNP-Solsona ti pannakatambang ni Sang. Bayan Member Jovencio Pascua iti nasao nga ili.
Segun kenni Sorsano, agawid kuma ni Pascua ken ti driver na idi simmabat dagiti suspek idiay Barangay Manalpac iti met laeng nasao nga ili ken pinalto-paltogan da dagitoy.
Inlawlawag ni Sorsano a napadaanan ti driver ti konsehal ti gandat nga aramiden dagiti suspek isut gapo na a dagus na nga inyatras ti lugan da ken naidungpar iti pader ti maysa a balay.
Inbatad na a kalpasan iti daytoy ket nagderetso dagiti suspek ken maipagarop a nagturong iti sentro iti nasao nga ili gapo a naregreg ti magazine ti M16 iti kalsada.
Narekobre dagiti otoridad dagiti dua a magazine ken ti maysa kadagitoy ket addaan ti 14 a bala, sabali pay ti naiwarang a 34 a bala ti M16, ken 11 nga empty shells, kasta met ti sako a nangikabilan dagiti suspek iti paltog.
Mainaig iti daytoy, kinumpirmaran ni Mr. Sydney Villora, driver ni Pascua a napasunagadan na ti panangasot dagiti suspek rason a dagus na nga inyatras ti lugan ken naidungpar iti maysa a balay a rason met a nagsardeng dagiti suspek.
Segun kenni Villora, idi nakita na manen a gandaten manen ti suspek ti umasot ti paltog ket pinataray na ti naglugan da ken naglibas dagitoy.
Inbatad na nga agarop 10 agingga iti 15 a mero ti kaadayo ti suspek iti lugan da.
Naamoan a kabayatan ti insidente ket dagus a napan iti backseat ti lugan ni Pascua ken insuot na ti bullet proof na.
Agtultuloy met ti imbestigasyon dagiti otoridad iti nasao a pasamak.
