LAOAG CITY – Naitapwak ken nagderetso iti kasamekan ti maysa a kotse iti asideg ti arko iti ili ti Vintar ken sakupen ti Brgy. Bulangon ditoy Siudad ti Laoag.
Segun ken ni PCpl. Aldrin Ramil, Duty Investigator ti Philippine National Police Laoag Traffic Division, ti driver ti kotse ket agtawen ti 23, naasawaan ken residente ti Brgy. 9 iti ili ti Vintar.
Inbatad na a bayat a dumaldalyasat ti nangiturong ti kotse nga agpa-amianan ket kellaat a napukawan ti kontrol iti manibela a nangitunda ti pannakaitapuak daytoy.
Inlawlawagna nga adda ti impluwensiya ti nasanger ti driver ken rumrumuar nga adda ti parikot na iti pamilia na no sadinno ket pinanawan ti asawa ken anak na.
Kunana nga agawid koman iti ili ti Vintar ti maseknan a naggapu ditoy Siudad ti Laoag ngem napasamak ti desgrasya.
Gapu iti daytoy, inbatad na a naikkat ti bumper iti sango ken likod ti kotse gapu iti impact ti napasamak a desgrasia.
