LAOAG CITY – Tinagbat ti maysa a senior citizen ti ub-ubing a kabsatna iti Brgy.62-A ditoy siudad ti Laoag.
Nabigbig ti biktima a ni Efren Juan Caday, agtawen ti 58 idinto a ti suspek ket ti in-inauna a kabsatna a ni Roy Caday, agtawen ti 64 ken residente dagitoy iti nasao a barangay.
Basar iti inisyal nga imbestigasyon dagiti otoridad, bayat nga agtugtugaw ti biktima iti family house da, ket ditoy a kellaat a tinagbat ti suspek ti makannawan a takiag ken bukot ti biktima babaen ti pagtabas nga agrukod iti 37 a pulgada.
Gapu iti daytoy, insigida a nagkiddaw ti tulong ni Efren Caday kadagiti opisial ti barangay ken nagtalinaed iti Gov. Roque Ablan Sr. Memorial Hospital.
Apaman a naipan iti ospital ti biktima ket dagus met a tinurong dagiti opisyal ti barangay ti pagtaengan ti suspek kalpasan nga inpakaammu ti biktima ti napasamak.
Nakita dagiti nagresponde ti suspek a ni Roy Caday iti family house da ken narekobre da ti pagtabas a naaramat iti insidente.
Agparparang iti imbestigasion a ti namunganayan iti nadakamat nga insidente ket gapu iti saan a panagkikinnaawatan dagiti agkabsat.
Inbatad met ti suspek a saan a daytoy ti umuna a gundaway a nagriri da iti kabsatna.
Kabayatanna, agbab-babawi ti suspek iti naaramidna ken inbatadna a napunwan laeng daytoy iti panangluko-luko kenkuana ti kabsat na.
Iti agdama, ket sumangsangu ti suspek iti kaso a frustrated murder.
