LAOAG CITY – Nagtalinaed iti kustoydar ti PNP-Laoag ti maysa a lakay kalpasan a ginandat na a paltugan ti mismo a kanaakan na iti Brgy. 40-Balatong ditoy siudad ti Laoag.
Iti impormasyon manipod iti PNP-Laoag, nabigbig ti suspek a ni Dominador Pasion, agtawen ti 65 ken ti biktima a ni Joseph Pasion, agtawen ti 36, kaanakan ti suspek.
Basar iti imbestigasyon dagiti otoridad, agin-inom ti nasanger iti ruar ti pagtaenganda ti biktima idi ta kellaat a nagpakita ti suspek.
Dita a maipagarup a nagkaryar ken inbaga ti suspek a ni Domindaor a kayat na ti mangpapatay kageddan ti pangipakita na ti ikot na a paltog iti kaanakanna ken timmalaw.
Gapu iti daytoy, sinurot ti biktima ti uliteg na ken dita kinomprontar na ti daytoy agingga a nagririda.
Iti panagriri dagiti aguliteg ket inruar ni Dominador ti paltog na ken pinaputok na iti namindua a daras ngem nakaliklik ti kaanakanna.
Kabayatanna, inpetteng ti suspek a ni Dominador a napan iti tianggi ken idi agawid ket sinurot ti kaanakan na agingga iti pagtaenganda ken dita a binakal na daytoy ti bato.
Kuna na a gapu iti inaramid ti kaanakanna na ket innala na ti paltog iti sirok ti katre ken dita nga inpaputok na ti namindua a daras.
Innayun ni Dominador a malaksid iti panagbakal ti bato ti kaanakanna ket dinanog na pay ti manugang na a naganawa.
Kabayatanna, inbatad na a sidadaan a mangsango iti kaso a maipila kenkuana.
Naamoan a ti nausar a paltog iti nasao nga insidente ket cal. 22 ken awanan ti lisensya.