LAOAG CITY – Inlawlawag ni PMaj. Arnel Tabaog, ti hepe ti PNP-Vintar ti napasamak a pammaltog a nakasugatan ti maysa a lakay iti Brgy. 1 San Roque iti ili ti Vintar.
Segun ken ni Tabaog, agawid kuman idi rabii ti pulis a nabigbig iti nagan a Francis Paelma, nakadestino iti Regional Civil Security Unit 1 ken residente iti Brgy. 1 nasao nga ili idi ta sinada dagiti aggi-inom iti kalsada.
Kuna ni Tabaog a basar iti palawag ti maysa kadagiti agin-inom a ni Rodelio Agbayani ket naiyawat ti maysa a bote ti nasanger ken ni Paelma ngem maipagarup nga inpukpok na iti ulo na.
Nu pay kasta, inbatad ni Tabaog nga iti palawag ti pulis ket inawat na ti bote ken inbelleng na ti kargo daytoy saan ketdi a naipukpok iti ulo ni Agbayani.
Mainaig iti daytoy, kuna ti hepe a kalpasan ti nasao nga insidente ket saan met a naaddaan ti ad-ado pay a diskusyon iti nagbaetan ti pulis ken ni Agbayani.
Nu pay kasta, idi nakaawid iti pagtaenganna ni Paelma ket dita a naglugan ti motorsiklo ti Agbayani ken nagsubli-subli a nagpaberber iti arubayan ti pulis.
Gapu iti daytoy, kuna ni Tabaog a gapu iti maipagarup a pannakairita ti pulis iti inaramid ni Agbayani ket rimuar daytoy tugot na ti 9mm a paltog.
Inbatad na a sinurot ti asawa na tapno lappedan ti posible a maaramid ti pulis ken iti pannakaanawa daytoy ket posible a nakalbit ti paltog rason a pimmutok.
Saan a natamaan ti bala ti paltog ti nakalugan iti motorsiklo a ni Agbayani ngem ketdi ti agtaktakder a lakay iti kalsada a ni Ricarte Paelma ken nagsagaba ti sugat iti akin kannigid nga ima daytoy.
Mainaig iti daytoy, kuna ni Tabaog a naiget ti panagimbestigar ti kapulisan iti nasao nga insidente.
Innayun na a maysa pay a maadal ket ti posible a kaadda iti dati a riri dagiti maseknan.
Kabayatanna, inbatad ti hepe nga agdepende iti pagtungpalan ti imbestigasyon ken iti desisyon ti piskalya ti mabalin a maipila a reklamo kontra iti pulis.
