LAOAG CITY – Inpakaammo ni P/Maj. Antonio Marzan, Hepe ti Pinili Municipal Police Station a maysa a lakay ti maipagarup a pinapatay ken tinakawan iti Barangay Darat iti ili ti Pinili.
Nabigbig ti biktima a ni Alejandre Arzadon, akinkukua ti carinderia.
Segun ken ni P/Maj. Marzan, basar iti manugang ti biktima a ni Jerryson Saludez, masansan iti oras ti alas tres wenno alas kuatro ti parbangon nga agturturong ti biktima tapno agisagana ken agiplastar iti carinderiada.
Nupay kasta, iti oras ti alas sais ti bigat ket nakigtot ti manugang ti biktima a nakatali iti tengngedna a nakagalot daytoy iti handle ti freezer.
Inlawlawagna nga inladawan ti maseknan a pamilia ti biktima a nasingpet, awan ti karirina ken agpapautang pay.
Gapu iti daytoy, saan a masinunuo ti pamilia no asino ti mabalin nga adda iti likudan ti napasamak nga insidente.
Kunana nga iti kallabes ket nagbayad metten dagiti naudi nga immutang iti biktima.
Inpettengna nga adda met ti singsing ken relo nga agmaris ti balitok ti biktima ngem saanda pay a masinunuo no adda ti kuarta a mapukpukaw nangruna ket nadakamat iti pamilia ti biktima a kanayon nga adda ti iggem a kuarta ti biktima.
Mainaig iti daytoy, kuna ni P/Maj. Marzan a maibasar iti medical examination ni Dr. Agnes Barlahan ti Rural Health Officer iti ili ti Pinili a natay ti biktima gapu iti maipagarup a panagpakamatay ken awan ti foul play a napasamak.
Innayonna a saanen nga interesado ti pamilia ti biktima a maipadalan iti autopsy ti bangkay ti biktima.
Naammoan a daytoyen ti maikatlo a daras a natakawan iti nasao a carinderia.
Iti agdama, manarimaan ti panangkitada kadagiti Close Circuit Television wenno CCTV camera a nakaimuntar iti asideg ti lugar tapno makatulong iti imbestigasion.
Immuna iti daytoy, inpakaammo pay ni P/Maj. Marzan a maysa a rabii sakbay ti insidente ket adda ti inpautang ti biktima a 110 a ribu a pisos.
