LAOAG CITY – Maysa a lakay ti nagsagaba ti sugat kalpasan a natennag manipod iti truck iti bayat a dumaldalyasat daytoy iti paset ti Brgy. 49-A Darayday ditoy siudad ti Laoag.
Inbatad ni Mrs. Marilyn Somejo, residente iti nasao a barangay ken isu ti nakakita ti insidente a manarimaan ti panagdalus na idi ta kellaat nga adda ti nangeg na a nagtupak bayat nga agdaldalus iti sango ti tianggi na.
Kuna na nga inpagarup na a kayo manipod iti karga ti truck ti naregreg ngem idi kinita na daytoy ket maysa a lakay ti nakadasay iti kalsada ken nagsagaba ti sugat iti ulo.
Inbatad na a naisabi-it iti nakawayway a waya ti kuryente ti lakay.
Immuna iti daytoy, inpakaammo ni Somejo a nabayagen a reklamo na iti kapitan dagiti nakalaylay a waya iti lugar da gapu iti desgrasya a posible nga intunda daytoy ken kanyun nga adda dagiti maisalat a behikulo.
Nu pay kasta, arig a saan a naaksyunan agingga nga adda ti nadangran a kas iti saanen a nabigbig a lakay.
Kabayatanna, saan met a masinunuo ni Somejo ti ti agtagikua a kompanya kadagiti nakalaylay a waya.
