LAOAG CITY – Naarestar ti maysa a lalaki iti naiyuswat a drug buybust operation iti Brgy. 31-Talingaan ditoy siudad ti Laoag.
Nabigbig ti subject ti operasyon Mr. Kenos Mike Reyes y Cabanig, agtawen ti 30, driver, ken residente iti Brgy. 4 iti ili ti San Nicolas.
Nakumpiskar manipod iti ikot ni Reyes ti maysa a cal. 38 revolver a paltog, lima a bala, walo a medium cut size transparent plastic sachet ti maatap a shabu ken 11 nga small cut heat sealed transparent sachet ti maatap met laeng a shabu pakairamanan ti 1,000 a pisos a money, ti mitsubishi montero ken dadduma pay a personal a kagamitan ti suspek.
Kabayatanna, inpetteng ni Reyes a saan na nga ammo ti rason ti pannakaiyuswat ti operasyon kenkuana gapu ta awan ti gundaway a nagusar wenno naglako ti iligal a droga.
Inlawlawagna nga adda ti nangtawag kenkuana nga agpaideliver ti para pallot a manok idiay Angeles, Pampanga isut gapu na a nagturong iti Brgy. Talingaan.
Nu pay kasta, kuna na a bayat ti panagturong na iti lugar a pangalaan na kadagit manok ket kellaat nga adda ti nangsada kenkuana a nakalugan iti motorisiklo.
Inbatad na a dita metten a pinapakleb dagiti nangsada a ken maipagarup nga inmula da ti paltog ken maatap a shabu kenkuana.
Innayun ni Reyes nga ammo na dagiti nasayaat ken saan nga aktibidad rason a saan na a maaramid ti agikot ti paltog wenno agaramid ti iligal nga aktibidad.
Kabayatanna, inpalgak ni PLt. Winnie Ravina, investigation officer ti PNP-Laoag, a ni Reyes ket maysa a buyer ti natiliw a drug courier a ni Ronald Melchor, ti nakakumpiskaran ti nasurok 5.2 milyon a pisoti maatap a shabu iti kallabes.