LAOAG CITY – Agtultuloy ti panagimbestigar dagiti kameng ti PNP ditoy siudad ti Laoag iti napasamak a pammaltog iti Brgy. 40 Balatong partikular iti paset ti Sanitary landfill iti Sitio Natdek iti nasao a barangay.
Daytoy ket kageddan ti panangduktal ti kapulisan ti pakabigbigan ti biktima a maipagarup a mapan agtakaw ti krudo dagiti heavy equipment a nakaparada iti sanitary landfill kadua na ti maysa met laeng nga indibidual.
Immuna iti daytoy, inpakaammo ni PLt. Col. Joemer Labiano, ti hepe iti PNP ditoy siudad nga iti inisyal a panagimbestigar da ket nagturong iti sanitary landfill ti biktima ken kadua na iti agarup alas dyes ti rabiii tapno agtakaw.
Inbatad na nga adda met dagiti dua a watchmen iti sanitary landfill ken dagitoy ti nakakita iti gandaw dagiti suspek.
Gapu iti daytoy, dita a napasamak ti pammaltog nga isu met ti puon ti nakatayan ti biktima.
Kabayatanna, boluntaryo a simmuko ti suspek iti kapulisan pakairamanan ti nausar iti pammaltog a cal. 22.
