LAOAG CITY – Nagtalinaed iti kustodyar ti PNP-San Nicolas ti maysa a lalaki kalpasan a naduktalan nga addaan ti ikot a balisong kabayatan ti pannakasita na iti checkpoint iti nasao nga ili.
Nabigbig ti suspek a ni Hashley Alita, maysa a bodegero ken residente iti Brgy. 24 iti nasao nga ili.
Segun ken ni PMaj. Joseph Tayaban, ti hepe iti PNP-San Nicolas, manarimaan ti pannakaiyuswat ti comelec checkpoint idi nasita ti suspek gapu iti panangiturong na iti motorsiklo nga awanan ti plate number ken saan a nakasuot ti face mask.
Gapu iti daytoy, kuna ti Tayaban a nabirok ti lisensya ni Alita ken nadawat ti or/cr ti motorsiklo.
Nu pay kasta, inpakaammo na nga apaman a nalukatan ti suspek ti compartment ti motorsiklo na ket dita a nakita ti maysa a balisong.
Kuna ni Tayaban a gapu iti daytoy ket naisyuan ti citation ticket ti suspek gapu iti saan a panagisuot ti face mask ken panaglabsing ti omnibus election code partikular iti panagikot ti aniaman nga armas.
Inbunannag na a posible a mabalod ni Alita agingga iti innem a tawen ken awan ti piyansa iti kaso na.
Kabayatanna, inpakaammo ti hepe nga addan ti immuna a reklamo kontra iti suspek seknan iti panaglabsing ti RA 9262 wenno ti Anti-Violence Against Women and their Children Act of 2004.
Inpetteng ni Alita nga awan ti aniaman a dakes a panggep na iti ikot na a balisong gapu ta aksidente laeng a naiyawid na daytoy manipod iti pagtrabahoan na.
