LAOAG CITY – Saan a ninamnama ti maysa a lalaki ti naiserbi kenkuana nga alyas warrant of arrest babaen kadagiti kameng ti Philippine National Police (PNP) iti panangidaulo ni Police Lt. Jimmy Aganon, ti chief of police iti ili ti Dumalneg.
Nabigbig ti akusado a ni Lawrence Zuniga, agtawen ti 44, awanan ti asawan ken residente iti Purok Salinog, Barangay Dampig iti ili ti Pagudpud.
Segun ken ni Aganon, kabayatan ti panangiserbi da ti alyas warrant of arrest a napetsaan ti Abril 8, 2002 ket nakigtot ni Zuniga gapu ta saanna a ninamnama nga adda paylaeng ti kaso na nga Assault Upon on Agent in Person Authority.
Inbatad ni Aganon a ti nagbalin a biktima ni Zuniga ket maysa a barangay kagawad iti met laeng barangay da ken pimmusayen daytoy isut gapuna a saan a ninamnama ti akusado a nga adda paylaeng ti kaso na.
Iti baet a pimmusayen ti biktima ket inserbi latta dagiti otoridad ti alyas warrant of arrest ken nairekomendar ti 4,500 a pisos a piyansa ti akusado para iti temporary a pannakawaya-waya na.
Iti agdama, nagtalinaed ti akusado iti kustodyar ti PNP iti ili ti Dumalneg.
