LAOAG CITY – Natay ti maysa a lalaki kalpasan a nakuryente kabayatan ti papanna koma panagkuryente ti lames iti waig iti paset ti Barangay 8, Bumitog iti ili ti Banna.
Segun ken ni Police Major Exequiel Giovanni Doloroso, ti chief of police iti ili ti Banna, ti biktima ket agtawen ti 51, naasawaan ken residente iti Brgy. Lumbaan-Bicbica iti ili ti Pinili.
Inbatad ni Doloroso nga adda ti dua a residente iti Brgy. Bumitog a napan iti waig tapno mapan agala ti lames ngem ditoy metten a nakita da ti nakaidda a biktima a mapapati a nakuryente isut gapuna nga intawag da a dagus ti napasamak kadagiti otoridad.
Naitaray ti biktima iti Dona Josefa Edralin Marcos District Hospital iti ili ti Marcos ngem naideklarar a dead on arrival.
Inrakurak ni Doloroso a daytoy ti kaunaan a gundaway nga adda ti pimmusay gapu iti pannakakuryente iti panagala ti lames iti ili ti Banna.
Innayon na a ti inusar ti biktima iti panagkuryente na koma ti lames ket ti baterya ti electric bike.
Kabayatanna, inpasingked ni Doloroso nga ad-adda pay a paigetan da ti agmonitor kadagiti possible nga agisaysayangkat pay ti panagkuryente ti lames iti nadakamat nga ili.
