LAOAG CITY – Nagtalinaed iti Mariano Marcos Memorial Hopsital and Medical Center iti ciudad ti Batac ken kritikal ti kasasaad ti biktima gapo iti napasamak a desgrasya iti Barangay Mabusag Norte, Badoc Ilocos Norte.
Nabigbig daytoy a ni Joel, agtawen ti 36, naasawaan, bus driver, ken residente iti Brgy. Maglaoi Sur iti ili ti Currimao nga isu ti nangiturong iti motorsiklo idinto a ti van ket ni Roderick, agtawen ti 39 ken residente iti Brgy. Palakipak Rosales, Pangasinan.
Segun kenni Police Major Joseph Tayaban, ti chief of police ti Philippine National Police iti ili ti Badoc, agpalaud ti nakamotorsiklo iti nasao a barangay ken immovertake iti maysa pay a motorista agingga a napan iti sabali a linya ken nasapgud na ti van ken nagderetso iti alad.
Kas resulta, natukkol ti saka ni Joel ken nagsagaba ti nakana a sugat iti ulo isut gapo na a nagtalinaed iti ospital.
Naamoan a ti nasao a driver ket adda iti impluwensya ti nasanger idi napasamak ti insidente.
Kabayatanna, kuna ni Tayaban nga iti sumarsaruno nga aldaw ket agsasarita dagitoy.
