LAOAG CITY – Balligi a naarestar dagiti ototridad ti maysa a lalaki nga agtawen ti 22, addaan ti live-in partner ken residente iti Brgy. 33-A Lapaz ditoy siudad ti Laoag gapu iti kaso a Reckless Imprudence Resulting in Serious Physical Injuries.
Naarestar ti lalaki babaen iti nagtipon a puersa ti Philippine National Police ditoy siudad pakairamanan ti Provincial Intelligence Unit iti Ilocos Norte Police Provincial Office iti Brgy. Pila ditoy siudad.
Segun ken iti pannakangiwat ti Ilocos Norte Police Provincial Office a ni P/Maj. Sheryl Guzman, naaretsar ti akusado iti bigat ti Enero 14, babaen iti bileg ti warrant of Arrest nga inyatnag ni Khristy Ahnn Queja Rivera iti Municipal Trial Circuit Court, Branch 1 ditoy siudad ti Laoag.
Gapu iti daytoy, narekomendaran ti akusado iti balor a P10,000 para iti temporario a pannakawayawayana.
Inbatad ni Guzman, a saan a tinungpal ti akusado dagiti inkarina iti nagbalin a biktima ti desgrasya idi tawen 2024, rason a nagipila ti reklamo ti biktima kontra iti lalaki.
Kabayatanna, nagtalinaed ti akusado iti kuerpo ti Philippine National Police ditoy siudad ti laoag ken manamnama a maidatag iti korte a naggapuan ti warrant of arrest.
