LAOAG CITY – Nagsagaba ti sugat ti maysa a lalaki kalpasan a nabagkong iti paset ti Barangay 3 iti ili ti San Nicolas, partikular iti likodan ti merkado publiko.
Segun kenni Police Major Eduardo Santos, ti chief of police ti Philippine National Police – San Nicolas ti biktima ket residente iti Barangay 10 idinto a ti suspek ket iti Barangay 1 iti nasao met laeng nga ili.
Iti inisyal nga imbestigasyon, agpada a nakainom ti suspek ken biktima pakariamanan dagiti kakadwa da idi adda ti saan da a nagkinnaawatan.
Inbatad na a kalpasan daytoy ket nagawid ti suspek ngem nagsubli ken ditoyen a binagkong na ti biktima iti akin-kannigid a bakrang na usar ti natarid a banag wenno ti mapapati nga ice pick.
Gapo iti daytoy, dagus met a niataray iti Black Nazarene ti biktima para iti pannakataming na ken dumalan iti operasyon.
Kuna ni Santos a saan da pay a narekobre ti inusar ti suspek ken basar iti maseknan ket inpurwak na daytoy kalpasan ti panangbagkong na iti biktima.
Kabayatanna, ti suspek ket adda iti kustudiyar ti kapulisan iti nasao nga ili bayat a maisagsagana ti maipila a kaso a frustrated murder kontra iti daytoy.
