LAOAG CITY – Nagsagaba ti sugat iti kili-kili, akin-kannigid nga abaga ken barukong ti maysa a lalaki kalpasan a binagkong ti live-in partner na a maysa a menor de edad iti Brgy. Balioeg iti ili ti Banna.
Segun ken ni Police Capt. Emerito Mamenta, ti chief of police iti ili ti Banna, ti biktima ket agtawen ti 25, construction worker idinto a ti suspek a live-in partner na ket agtawen ti 17, agpada dagitoy a residente iti nadakamat a barangay.
Inbatad ni Mamenta a basar iti inwayat da nga imbestigasyon, agpada nga adda iti impluwensya ti nasanger dagiti aglive-in partner idi adda ti saanda a nagkinnaawatan no sadinno a gapu iti nakaro a panagriri da ket adda pay dagiti binubuong da a kagamitan, ken idi naikkan ti gundaway ti suspek ket binagkong na ti live-in partner na.
Kuna ni Mamenta a nagasat ti biktima gapu ta narabaw ken saan a nakaro dagiti sugatna rason a napalubusan metlaeng a nagawid manipod iti Mariano Marcos Memorial Hospital and Medical Center iti ciudad ti Batac kalpasan ti pannakataming na.
Inpakaammo na a gapu ta menor de edad ti suspek ket inturnover da iti Municipal Social Welfare and Development iti nasao nga ili.
Innayon na a naamoan da pay a masansan nga agriri dagiti aglive-in partner.
