LAOAG CITY – Pimmusay kalpasan a nagbekkel ti maysa a lalaki iti Brgy. 51-B Nangalisan ditoy siudad ti Laoag.
Nabigbig ti pimmusay nga agtawen ti 54, naasawaan ken residente iti nasao a barangay.
Basar iti imbestigasyon ti PNP-Laoag, naduktalan lattan ti maysa kadagiti kabbalay ti biktima a nakabitin daytoy iti bodega ti pagatenganda babaen ti electric wire.
Dagus a nagparesponde ti pamilya ken iti panangeksamin ti city health officer ditoy siudad a ni Dr. Joseph Adaya ket pimmusay ti biktima gapu iti asphyxia – secondary to hanging.
Rumrumuar nga addan uppat nga oras ti napalabas sakbay a nakita ti biktima.
Personal met a rason ti makitkita dagiti otoridad a rason ti panagpakamatay daytoy.
