LAOAG CITY – Balligi a natiliw iti naiyuswat a drug buy bust operation iti Brgy. 23 ditoy siudad ti Laoag ti maysa a lalaki.
Nabigbig ti subject ti operasyon a ni Jay Danny Garcia, agtawen ti 36, balo ken residente iti Brgy. 28 ditoy siudad ti Laoag.
Iti naiyuswat nga operasyon, maipagarup a naglako ti suspek ti maysa a sachet ti maatap a shabu iti nagpammarang a poseur buyer.
Malaksid iti daytoy, nakumpiksar iti subject ti nayun a siyam a sachet ti maatap a shabu, buy bust money ken drug paraphernalia.
Naamoan a ni Garcia ket miembro ti maysa a drug group ditoy probinsya ken maikatlon a daras a matiliw nu sadino a naudi idi tawen 2017 gapu met laeng iti kaso a panaglabsing iti RA 9165 wenno Comprehensive Dangerous Drugs Act of 2002.
Kabayatanna, kadua ni Garcia iti lugan nga inusar na a nagturong iti operasyon ti agtawen ti maysa nga anak na ken menor de edad a kaanakan daytoy.
Nagkedked a nangited iti aniaman a komento ti subject seknan iti pannakatiliw daytoy.
