LAOAG CITY — Ubing pay laeng ni Tang Shangjun ket arapaapna ti agadal idiay Tsinghua University, daytoy ti gapuna isu a nagturpos isuna ti highschool idi 2009 ket pinadasna ti nag-eksamen tapno makapasa iti arapaapna nga eskuelaan.
Nupay kasta ket arigna a kas naliklikan isuna ti gasat ta uray namin-16 a daras, a pinadasna ti nageksamen ket saan latta isuna a nakapasa iti nadakamat nga unibersidad.
Pagaammo ti Tsinghua University gapu iti nangato unay a kasapulan nga iskor iti admission exam.
Segun ken ni Tang, uray no makastrek isuna iti Tsinghua University ken agpalista iti kayatna a kurso, nababa ti tsansana a makasarak iti nasayaat a trabaho kalpasan ti panagturposna gapu iti tawenna.
Iti agdama, kayat ni Tang ti agpokus iti panagbirok iti trabaho ken saanna a masigurado no planona ti mangala manen iti national college admission exam inton sumaruno a tawen.
