LAOAG CITY – Naidumduma ti kinaluko ti maysa nga agtawen 23 a lalaki idiay Poland a sumango iti agingga iti walo a tawen a pannakaibalud kalpasan a nag-order iti ginasut a pizza nga agus-usar iti nagan ti dadduma a tattao ken nangipatulod iti nadumaduma nga address iti intero a pagilian.
Naarestar ti suspek a taga-Szczecin kalpasan nga imbestigaran ti Central Bureau for Combating Cybercrime (CBZC) ti agsasaruno a peke nga order ti pizza a maipagarup a nakaigapuan ti dakkel a pannakapukaw ti sumagmamano a restaurant.
Segun kadagiti otoridad, saan nga ammo dagiti tattao a nainaganan kas recipients a naipaay dagiti order babaen ti panangusar iti impormasionda.
Insigida met a nangiwayat ti panag-raid dagiti polis ti pagtaengan ti suspek ken kinompiskarda ti sumagmamano nga electronic devices ken data storage a mapapati a naaramat a nangikabil kadagiti peke nga order.
Sumangsango itan ti lalaki kadagiti alegasion a pakairamanan ti stalking, identity fraud ken pannakapukaw dagiti negosio.
