LAOAG CITY – Napaneknekan manen ti agtawen 41 a ni Damian Kasprzyk iti Poland no apay a naawagan iti “King of Cold” kalpasan a nagtalinaed a nakarebreb iti napno iti yelo a danum iti 1 nga oras ken 29 a segundo. Daytoy ti nangitunda kenkuana a makagun-od ti titulo ti Guinness World Records para iti longest duration submerged in ice water.
Naartapan ni Kasprzyk ti dati a rekord a 58 a minuto, nga inaramid ti padana a Pole Valerjan Romanovski idi napan a tawen.
Saanen a baro ken ni Kasprzyk dagiti karit iti nakaro a lamiis. Nakaipasdek metten iti world record kalpasan a nairebreb ti bagina iti niebe iti nasurok a dua nga oras. Isu ket addaan pay ti rekord para iti longest duration full body contact with ice kalpasan ti panagtalinaedna a naan-anay a naabbungotan iti yelo iti las-ud ti 5 nga oras, 1 a minuto ken 33 a segundo.
Kinuna ni Kasprzyk a narigrigat ti kaudian a record attempt-na gapu ta naparpartak a mapukaw ti pudot ti bagi no mairebreb iti danum, nangruna manipud iti ulo.
Impaganetgetna a ti kinatalged ti kangrunaan a prioridad iti tunggal gandatna ken kanayon nga adda dagiti team-na a nakasagana a tumulong.
