LAOAG CITY – Natiliw ti maysa a lalaki iti Sitio 6, iti Brgy. 55-A, Barit ditoy siudad ti Laoag.
Daytoy ket kalpasan a naduktalan ti Philippine National Police ditoy siudad ti Laoag ti suspek nga agisaysayangkat ti Illegal Quarry Operation.
Ti nasao nga operasion ket indauloan ni Police Captain Tolentino Erum Jr., Team Leader, babaen ti direkta a panangimaton ni Police Colonel Julius Suriben, ti Provincial Director ti Ilocos Norte Police Provincial Office ken ti Provincial Quarry Office nga idadauloan met ni Mr. John Calderon.
Nabigbig ti suspek a ni Pedro Acorda y Lubera, agtawen ti 40, naasawaan, driver ti blue mini dump truck, residente ti Brgy. 55-B, Salet, Bulangngaon ditoy siudad ti Laoag.
Gapu iti daytoy, naikkan ti citation ticket ti suspek gapu iti panaglabsing iti Provincial Quarry Ordinance 042-2020 nga addaan ti citation ticket number 037-2023.
Kabayatanna, naduktalan dagiti otoridad ti akinkukua ti nasao a truck a ni Oliver Domingo, agtawen ti 48, naasawaan ken residente iti Brgy. 55- A Barit ditoy siudad ti Laoag.
Iti agdama, ti nasao a mini dump truck ket na-impound ken naipasidong iti kustodiar ti Provincial Quarry Office para iti naan-annay a pannakaimbestigarna.
