LAOAG CITY – Nagtalinaed iti Intensive Care Unit (ICU) iti Mariano Marcos Memorial Hospital and Medical Center ti biktima iti napasamak a pammaltog iti Brgy. Pagsanahan Sur iti ili ti Badoc.
Daytoy ti inpakaammo ni PMaj. Joseph Tayaban, ti hepe iti PNP-Badoc.
Binigbig ni Tayaban ti biktima a ni Allen Cayudoy y Perez idinto a dagiti dua a suspek ket isuda Gerald Daguipon kenni Edwarson Daguipon, agpada nga addan iti legal age ken agpada a residente iti Brgy. Morong iti nasao nga ili.
Inbatad ni Tayaban a basar iti naiyuswat nga imbestigasyon ket rumrumuar a kinomprontar ti maysa a barkada ti biktima dagiti dua a suspek gapu iti panagririri da iti kallabes.
Kuna na a kabayatan ti komprontasyon ket dita a naulit ti panagririri dagiti maseknan.
Inbaga ni Tayaban a dita a nagpaarayat ti barkada ti biktima ken iti panaganawa na ket isu met ti pinaltu-paltugan dagiti dua a suspek iti nagduduma a paset ti bagi daytoy.
Dagus a naitaray iti Karmeli Hospital iti ili ti Pinili ti biktima ngem naiyakar met laeng iti MMMH&MC.
Kabayatanna, agtultuloy a mabirbirok dagiti nakalibas a suspek ken ti pannakaduktal ti pudno a motibo iti nasao nga insidente.
