LAOAG CITY – Kinumpirmaran ni PMaj. Joseph Tayaban, ti hepe ti PNP-Badoc a natiliw ti maysa a lalaki gapu iti gandat a panagbagkong.
Binigbig ni Tayaban ti suspek a ni Gilbert Idnay, adda iti umno nga edad ken residente iti Brgy. Murong iti nasao nga ili.
Inlawlawag ni Tayaban a namunganay ti pannakatiliw ti suspek kalpasan a nakaawat da ti report mainaig iti panagprobokar daytoy idi bigat kalman.
Kuna na nga iti panagresponde da iti lugar ket nakita a nakaiggem ti suspek ti dua a kutsilyo ken ginandat na nga ibagkong iti kabsat na karkaryaren na.
Gapu iti daytoy, dagus a naarestar ti suspek ken nagtalinaed iti kuerpo ti pulisya.
Immun-una iti daytoy, inpakaammo ni Tayaban a sakbay ti pannagprobokar ti suspek ti kabsat na idi bigat kalman ket nangkaryar pay daytoy iti rabii idi Mayo 28.
Kuna na a ti makitkita da a motibo iti panangprobokar ti suspek iti kabsat na ket gapu iti pananganawa na nu agkarkaryar wenno mangriribok daytoy.
Kabayatanna, kuna ni Tayaban a malaksid iti maipila a kaso nga attempted homicide ken alarm and scandal kontra iti suspek ket addan ti immuna a kaso a naipila kenkuana.
Inbatad na a maysa ditoy ti kaso a Rape ken mainaig iti panagsalungasing ti kaso nga RA 7610.
Innayun na a nabalod pay ti suspek idi 2016 gapu met laeng iti kapada a kaso ngem nawaya-wayaan.