LAOAG CITY – Natay ti maysa a lalaki kalpasan ti pannakalmes na iti Cura River bisinidad ti Barangay Barbaquezo iti ili ti Carasi.
Nabigbig daytoy a ni Saturnino Ramos y Corpuz, agtawen ti 45, maysa a mannalon ken residente iti nasao a barangay.
Basar iti report, nakaawat ti report ti PNP-Carasi manipud kenni Mrs. Gudelia Abal, ti Municipal Treasurer iti nasao nga ili mainaig iti pannakalmes ti kabsat na.
Dagus met a nagturong dagiti kameng ti PNP-Carasi pakairamanan ti RHU ken MDRRMO para iti pannakaiyuswat ti search and rescue operation.
Iti inisyal nga imbestigasyon, napan nagkalap ti biktima iti Cura River kadua na da Sang. Bayan Member Eric Pascua Advincula, agtawen ti 49 ken residente iti Brgy. Virbira iti nadakamat nga ili ken Marlon Manggay Decano, agtawen ti 34, awanan ti asawa ken residente iti Brgy. Angset.
Nupay kasta, rumrumuar a nagtapwak ti biktima iti karayan a rason ti pannakaiyanod na gap iti napigsa nga ayos ti danom.
Naamoan a ginandat da Advincula ken Decano nga isalakan ti biktima ngem napaay dagitoy isut gapo na a dagus da a nagkiddaw ti tulong.
Mainaig iti daytoy, inbatad ti PNP a narekobre ti biktima iti karayan a paset ti Barangay San Julian iti ili ti Solsona ken naitaray daytoy iti Rural Health Unit ngem naideklara a pimmusay.
Kabayatanna, naamoan a ti rason ti nakatayan ti biktima ket Acute Respiratory Failure secondary to drowning.
