LAOAG CITY – Balligi ti ti pannakatiliw ti maysa a lalaki gapo iti iligal a panagpukan ti kayo iti Barangay Cacafean iti ili ti Marcos.
Nabigbig daytoy a ni Rolly Bangi, agtawen ti 51, awanan ti asawa ken residente iti nadakamat a barangay.
Segun kenni Police Captain Jonevale Maramag, ti chief of police ti PNP-Marcos, adda ti naawat da ti report nga adda ti agibyahe kadagiti napukan a kayo rason a dagus da a nagresponde.
Nakita met a mismo dagiti otoridad ti maysa a kurong-kurong nga addaan ti karga a tallo a naputed a kayo ken inturong daytoy ti maysa a menor de edad ken ti kadua na nga agtawen ti 17.
Inlawlawag na a basar iti palawag dagiti menor de edad ket inbaon isuda ti ama da ken dagiti dadduma a naputed a kayo ket addan iti furniture shop a kukua ti agtawen ti 50 a lalaki iti nasao met laeng a lugar.
Gapo iti daytoy, nagturong dagiti otoridad iti furniture shop ken nadiksubre da dagiti 10 a pidaso ti naputed a kayo.
Naamoan a bayat nga adda dagiti otoridad iti furniture shop, dimteng ni Rolly Bangi ken inbaga daytoy a kukua na dagiti kayo ngem napaay a nangipresentar ti permit a rason ti pannakatiliw na.
Kabayatanna, iti agdama ket adda iti kustudiyar ti PNP-Marcos ti suspek ken manamnama a mapilaan ti kaso a panaglabsing iti PD 705.
