LAOAG CITY – Natay ti maysa a lalaki kalpasan a nalmes iti karayan a masakupan iti Brgy. Barbar iti ili ti Pinili.
Nabigbig ti biktima a ni KNoel Patrick Oasay y Pascua, agtawen ti 27 ken residente iti Brgy. Badio iti nasao nga ili.
Basar iti imbestigasyon ti PNP-Pinili, nagturong iti nasao a karayan ti pamilya ti bikima tapno agpicnic ket dita a nagdigus ti biktima.
Nu pay kasta, kalpasan ti sumagmamano a minutos ket saan a napagsubli ti pamilya ti biktima rason a binirok da daytoy ket naduktalan nga adda iti adalem a paset ti karayan.
Nagpatulong ti pamilya kadagiti otoridad para iti pannaisalbar ti biktima ngem naideklara a dead on arrival bayat a naipan iti ospital.
Kabayatanna, naamoan nga adda iti impluwensya ti nasanger ti biktima idi napasamak ti nasao nga insidente.
