LAOAG CITY – Inbatad ni Police Major Joseph Baltazar, ti chief of police iti ili ti San Nicolas nga adda ti maysa a lalaki iti Barangay 18, Bingao iti nasao nga ili a rinespondian da gapu iti panagwalwala na.
Segun ken ni Baltazar, kalpasan a naireport kadakuada ti ar-aramiden ti lalaki a binigbig na a ni Alex Ventura ket dagus a napan nagresponde dagiti kakadwa na.
Ditoy a naamoan dagiti kameng ti pulisya a kabayatan a nakainom ti nasanger ni Ventura ket napan na sinirrek ti maysa a tianggi tapno mangala ti nayun ti ininum na ken dinangran na pay ti akin-tianggi.
Malaksid iti daytoy, nagsursur pay ni Ventura kadagiti balbalay ken binubuong na ti tawa dagitoy.
Inbaga ni Baltazar nga adda pay ti tinagtagbat a motorsiklo ken makina ti kuliglig.
Inpakaammo ti opisyal nga iti panagresponde dagiti pulis ken ginandat da nga anawaen ni Ventura ket isuda met ti darupen nan.
Gapu iti daytoy, awan ti naaramiden dagiti kameng ti pulisya no saan a ti nangpaltog ti akin-kannawan a gurong ken luppo ni Ventura.
Kalpasan a napaltugan dagiti pulis ni Ventura ket intaray da met laeng a dagus iti Mariano Marcos Memorial Hospital and Medical Center iti ciudad ti Batac para iti pannakaagas na.
Kabayatanna, inbatad ni Barangay Chairman Angelus Ulep iti Barangay 18, Bingao iti ili ti San Nicolas a nabayagen a problema iti barangay da ni Alex Ventura.
Inbaga na a saan pay nga isuna ti kapitan iti barangay da ngem problema dan ni Ventura.
Inlawlawag na a ni Ventura ket patien da nga adda ti problema iti panagpanpanunot na ken sigud nga agas-adas daytoy.
Nupay kasta, gapu iti pandemya ken ka-krisis ti kwarta ket mabalin a naisardeng a naigatangan dagiti kabbalay na ti agas ni Ventura.
Inbaga ti kapitan a saan da a mairekomendar a mapan iti mental ospital gapu ta awan ti makapaneknek a pudno nga adda ti problema ti panagpanpanunot da ken no kasarita ti doctor ket nalaing met daytoy nga agsungbat.
Innayon ni Ulep a dagiti balay a dinadael ni Ventura ket kukua dagiti immunan a kinasango na iti barangay.
