LAOAG CITY – Agtultuloy ti imbestigasyon dagiti kameng ti PNP-Pasuquin iti kellaat a panangtagbat ti maysa a lalaki iti pada na a lalaki iti Sitio Nagabungan, Brgy. 5, Davila iti nasao nga ili.
Binigbig ni Police Patrolman Robin Andres ti biktima a ni Allan Sumaoang y Espinosa, agtawen ti 39, naasawaan, driver ken residente iti Brgy. Dilavo iti nasao nga ili idinto a ti suspek ket ni Menard Gaspar, care taker ti piggery ken residente iti Barangay Davila, iti nasao met laeng nga ili.
Inlawlawag ni Andres a basar iti palawag ni Sumaoang, napan da iti maysa a bar ken idi adda da iti ruwar ket kellaat lattan a tinagbat ni Gaspar ti biktima iti saan nga ammo a rason.
Gapo iti daytoy, nagsagaba ti biktima ti sugat iti akin-kannigid a likod ti dakulap a nakairaman dagiti tallo a ramay na, ken ti kikit ti akinkannawan nga ima na.
Naitaray ti biktima iti Gov. Roque Ablan Senior Memorial Hospital ditoy ciudad ti Laoag ngem naiyakar iti Mariano Marcos Memorial Hospital and Medical Center iti ciudad ti Batac ngem nagabalin nga “out patient”.
Segun kenni Andres, mabalin a napasamak ti insidente gapo ta napagtripan laeng wenno nakursunadaan ti suspek ti biktima gapu ta saan da nga agam-ammo.
Saan met a makumpirmaran ni Andres no sadinno ti nangalaan ti suspek ti armas nga inusar na iti insidente ken saan da pay a narekobre daytoy.
Agtultuloy met a birbiruken dagiti otoridad ti suspek a naglibas a nagpaabagatan a direksyon kalpasan ti nasao a panagtagbat.
