LAOAG CITY – Nakabkabil ti maysa a lalaki babaen kadagiti dua a saan pay a nabigbig a lallaki iti asideg ti terminal ti Laoag-Pasuquin ditoy ciudad ti Laoag.
Segun iti Philippine National Police ditoy ciudad ti Laoag, ti biktima ket agtrabtrabaho iti maysa a lodging house ken kalpasan ti duty na iti ala-una ket nagtambay pay laeng.
Ditoy metten nga immasideg dagiti dua a suspek ken maipagarop a kinabkabil da ti biktima ken innala da ti cellphone nga agbalor ti 20 a ribo a pisos.
Gapo iti daytoy, dagus a nagturong iti istasyon ti pulisya ti biktima tapno ipakammo ti napasamak kenkuana.
Kabayatanna, nagballaag met ti pulisya a saan nga agtambay iti kastoy nga oras nangruna ket adda dagiti madi ti panagpanpanunot na nga indibidual.
