LAOAG CITY – Naarestar ti maysa a lalaki gapu iti panagikot na ti paltog iti Brgy 29, Pasil iti ili ti Paoay.

Ti suspek ket agtawen ti 45, naasawaan ken residente iti Brgy Nammuac, Sanchez Mira, Cagayan.

 Basar iti Philippine National Police iti ili ti Paoay, nakaawat da ti impormasyon a ti lalaki a maatap nga adda ti iggem na a paltog ket agsursursur iti nadakamat a lugar.

 Dagus a nagturong dagiti otoridad iti lugar iti panangidaulo ni Police Capt. Jackson Sugayen, ti chief of police iti ili ti Paoay, ngem apaman a nakita ida ti suspek ket nagtaray a nagpaamyanan bitbit na ti sling bag na.

Naamoan nga idi dandanin makamatan dagiti otoridad ti suspek ket inpurwak na ti sling bag na.

Iti panangsukimat dagiti otoridad iti sling bag ti suspek ket ditoy a nakita da ti maysa a cal. 38 revolver nga addaan ti tallo a bala, maysa a cellphone ken ti kwarta na a P190 a pisos.

Awan ti naipakita ti suspek a dokumento mainaig iti panagikot na ti paltog.

Manamnama a sumango ti suspek iti panaglabsing iti Republic Act 10591 wenno Comprehensive Firearms and Ammunition Regulation Act ken Comelec gun ban.

Iti agdama, nagtalinaed ti suspek iti Philippine National Police iti ili ti Paoay.