LAOAG CITY – Naarestar ti maysa a lalaki gapu iti panangitaray na ti maysa a motorsiklo iti Brgy. 54-A, Lagui-Sail ditoy siudad ti Laoag.
Binigbig ni Police Chief MSgt. Eric Bumagat, ti Duty Desk Officer iti PNP-Laoag ti suspek a ni Ritz Jude Ramos Domingo, agtawen ti 22, awanan asawa, helper ken residente iti nadakamat a barangay.
Kabayatanna, kuna na a ti biktima ket ni Mark Jayson Ramos Mique, agtawen ti 25, awanan asawa, tricycle driver ken residente ti Brgy. 56-A, Bacsil ditoy siudad.
Inbatadna a basar iti naiyuswat nga imbestigasyon, agarup alas syete y media itay bigat ket naripar ti biktima a mapukpukaw ti motorsiklona a Mitsubishi Euro nga agmaris ti nangisit nga addaan ti Engine Number 161FMJF1410008, MV File Number 0101-00000148303 ken Chassis Number LF3PCK501FB800825 ken naiparking iti waiting shed nga asideg iti pagtaengan ti nobya na.
Inlawlawagna a gapu iti daytoy ket dagus nga inpakaammo ti biktima kadagiti kapamilyana tapno biruken ti motorsiklo.
No pay kasta, kunana a kalpasan iti sumagmamano a minuto ket nakaawat ti tawag ti biktima manipod iti bayawna ken inpakaammo na a nakita na ti suspek a nangmaneho iti motor na iti Brgy. 29, Sitio Lusong ditoy siudad.
Gapu iti daytoy, kuna ni Bumagat a nagturong iti kuerpo ti pulisya ti biktima ken dagus a nagrepsonde dagitoy.
Nakita ti suspek a nakalugan iti motorsiklo ti biktima ken dagus a nakemmeg.
Inadmitir ti suspek a saanna nga inpakada ti motorsiklo ken mapan laeng koma agpaspasiar iti pagtaengan ti uliteg na iti Brgy. 29.
Naammoan nga agam-ammo ti suspek ken ti nobya ti biktima.
Agpapan a maisursurat ti damag ket annarimaan metten ti pannakaisagana kadagiti kasapulan a dokumento iti pannakaipila ti kaso a panaglabsing ti Republic Act No. 10883 wenno ti Anti-Carnapping Law.
