LAOAG CITY – Naarestar ti maysa a lalaki iti naiyuswat a drug buy bust operation iti Brgy. 28 ditoy siudad ti Laoag.
Ti suspek ket agtawen ti 19 ken residente iti Brgy. 21 ditoy met laeng siudad.
Iti naiyuswat nga operasyon, nakumpiskar iti suspek ti maysa a sachet ti maipagarup a napagango a marijuana nga isu ti nagatang ti nagpammarang a poseur buyer iti balor a 500 a pisos.
Malaksid iti daytoy, naala pay iti ikot ti suspek ti nayun a maysa a ziplock a naglaon ti maipagarup a bulong ti marijuana.
Naamoan a ti suspek ket street level individual ken damo na ti matiliw gapu iti iligal a droga.
