LAOAG CITY – Nabirukan ti agruprupsan a bangkay ti maysa a lalaki iti kabakiran idiay Sitio Manayun, Barangay 23, San Andres, Sarrat, Ilocos Norte.
Segun ken ni Barangay tanud Erick Gaodia iti nasao a barangay, possible nga addan iti lima nga aldaw a natay ti saan pay a nabigbig a biktima.
Iti palawag ni Gaodia, bayat ti papan panagala ti maysa a kabarangayan da nga agnagan iti Ferdinand iti alukon iti kabakiran a paset ti nasao a lugar ket nakita na ti bangkay iti waig.
Inbatad ti barangay tanud a possible a taga sabali a lugar ti biktima gapu ta saan da nga am-ammo daytoy.
Kinumpirmaran ti barangay tanud nga adda ti kabarangayan da a mapukpukaw ngem saan a ti nabirukan a bangkay.
